Source: https://www.bbc.com/urdu/science-45662159
گوگل: 20 سال بعد بھی 10 چیزیں جو آپ نہیں جانتے
GETTY IMAGES
کیا آپ کو گوگل سے پہلی کی زندگی یاد ہے؟ آپ کیا کرتے تھے جب آپ کو فوری طور پر معلومات چاہیے ہوتی تھیں؟
کسی لفط کی ہجے، ریسٹورنٹ کا راستہ، خاص دکان یا کسی دور افتادہ پہاڑی جھیل کا نام آپ ممکنہ طور پر ان معلومات کے لیے گوگل ہی استعمال کریں گے۔
امریکی جریدے فوربز کے مطابق اوسطاً گوگل 40 ہزار سرچ فی سیکنڈ کرتا ہے یعنی ایک روز میں ساڑھے تین بلین۔
کرہ ارض کا سب سے مشہور سرچ انجن گوگل صرف سرچ انجن ہی نہیں رہا بلکہ یہ اشتہاروں کے لیے اہم پلیٹ فارم، کاروباری ماڈل اور ذاتی معلومات اکٹھی کرنے کا ذریعہ بن چکا ہے۔
ہاں جب بھی ہم گوگل پر کسی چیز کی تلاش کرتے ہیں تو گوگل کو ہماری ترجیحات اور عادات کے بارے میں مزید معلومات ملتی ہیں۔ لیکن گوگل ہمارے بارے میں کتنا چانتا ہے؟
مندرجہ ذیل گوگل کے بارے میں کچھ دلچسپ باتیں ہیں جو آپ کو حیران کر دیں گی۔
1. نام
GETTY IMAGES
گوگل کا کیا مطلب ہے؟ اب سے کچھ عرصہ قبل تک تو اس کو کوئی مطلب نہیں تھا۔
گوگل اصل میں ریاضی کی اصطلاح ’گوگول‘ کی غلط ہجے ہے۔ گوگول اصل میں 1 اور اس کے بعد 100 صفر کو کہتے ہیں۔
اس حوالے سے کئی غیر متسند کہانیاں ہیں کہ کیسے ابتدائی دنوں میں یا تو کسی انجینیئر نے یا طالب علم نے اصل ہجے کو غلط لکھا۔ اور یہ غلطی مرکزی دھارے کا حصہ بن گئی۔
2. ’بیک رب‘
GETTY IMAGES
گوگل کے مشترکہ بانی لیری پیج اور سرجی برِن نے گوگل کا نام ’بیک رب‘ رکھا تھا۔
اس نام کا مساج سے کوئی تعلق نہیں تھا بلکہ یہ اس نظام کو کہا جاتا ہے جس میں ماضی میں دیے گئے لنکس کے ذریعے صفحات کو ڈھونڈنا اور رینک کرنا ہے۔
3. صرف کاروبار ہی نہیں
گوگل میں صرف بزنس ہی نہیں بلکہ وہاں کافی خوش مزاجی بھی ہے۔ اگر یقین نہیں آتا تو انگریزی لفظ "askew" گوگل کریں اور خود جان لیں۔
4. بکریاں
GETTY IMAGES
گوگل کمپنی کا کہنا ہے کہ وہ ماحولیاتی تحفظ کے حق میں ہے اور اسی لیے اس نے گھاس کاٹنے کے لیے مشین نہیں بلکہ بکریاں رکھی ہوئی ہیں۔
کیلیفورنیا کے علاقے ماؤنٹین ویو میں واقع گوگل پلیکس ہیڈ کوارٹر کے بڑے بڑے باغات کی دیکھ بھال متواتر ہونی ضروری ہے۔ اسی لیے آپ کو ان باغات میں 200 بکریاں گھاس چرتے ہوئے دکھیں گی۔
5. بڑھتا ہوا کاروبار
GETTY IMAGES
جی میل، گوگل میپس، گوگل ڈرائیو، گوگل کروم بنانے کے علاوہ ۔۔۔ گوگل 2010 سے اوسطاً ہر ہفتے ایک کمپنی خرید رہا ہے۔
آپ کو شاید یہ معلوم نہ ہو لیکن 70 دیگر کمپنیوں کے علاوہ اینڈروئڈ، یو ٹیوب، ویز اور ایڈ سنس جیسی کمپنیاں بھی گوگل ہی کی ہیں۔
6. ڈوڈل
GETTY IMAGES
سب سے پہلا گوگل ڈوڈل 30 اگست 1998 میں استعمال کیا گیا اور یہ محض یہ پیغام دینے کے لیے تھا کہ ’دفتر میں نہیں ہوں گے‘۔
یہ خیال لیری اور سرجی کو اس وقت آیا جب وہ نیواڈا میں ’برننگ مین فیسٹیول‘ پر گئے اور جاتے ہوئے انھوں نے صارفین کو یہ بتانے کے لیے وہ دفتر میں نہیں ہوں گے اپنی ای میل میں ’برننگ مین‘ کا ڈوڈل بنایا۔
تب سے گوگل میں ڈوڈل ایک روایت بن گئی ہے کہ اہم دن یا شخصیات کے حوالے سے خاص طور پر تیار کردہ آرٹ ورک کا ڈوڈل بنایا جاتا ہے۔
7. گوگل کے لیے نہیں
سنہ 1999 میں لیری اور سرجی گوگل کو دس لاکھ ڈالر میں فروخت کرنا چاہتے تھے ۔۔۔ لیکن خریدار کوئی نہیں تھا حتیؤ کہ ان دونوں نے قیمت بھی کم کی۔
گوگل کی اس وقت قدر 300 بلین ڈالر سے زیادہ ہے۔ کسی کو تو افسوس ہو رہا ہو گا کہ یہ موقع ہاتھ سے کیوں جانے دیا۔
8. اصول عمل
GETTY IMAGES
گوگل کمپنی کا ایک اصول عمل یہ ہے کہ ’کسی کو نقصان نہ پہنچائیں‘۔
کیا کمپنی نے اس پر عمل کیا ہے؟ اس کا فیصلہ آپ پر چھوڑتے ہیں۔
9. خوراک کی اہمیت
GETTY IMAGES
امریکی جریدے فوربز کے مطابق گوگل کے بانی سرجی برِن نے کمپنی بنانے کے فوری بعد ہی یہ سوچ لیا تھا کہ اس کمپنی کا کوئی دفتر کھانے کی جگہ سے 60 میٹر سے زیادہ کے فاصلے پر نہیں ہو گا۔
کہا جاتا ہے کہ گوگل کے آغاز پر کمپنی کا پسندیدہ ترین کھانا ’سویڈش فش‘ تھی۔ لیکن آج کل گوگل کے ملازمین کو مختلف قسم کے کھانوں اور بہترین کوفی تک رسائی حاصل ہے۔
10. گوگل کا بہترین دوست
GETTY IMAGES
گوگل کمپنی میں پرانے ملازمین کو گوگلرز کہا جاتا ہے جبکہ نئے ملازمین کو نوگلرز کہا جاتا ہے۔ دونوں ہی قسم کے ملازمین کو اپنے پالتو جانور دفتر لانے کی اجازت ہے اگر یہ جانور تربیت یافتہ ہیں اور دفتر میں گندگی نہیں کریں۔
کیا آپ کو معلوم ہے ۔۔۔
GETTY IMAGES
اگرچہ گوگل کی سرچ کرنے کی صلاحیت میں 1999 کے مقابلے میں 100 گنا اضافہ ہوا ہے لیکن وہ اس کو 10 ہزار گنا تیزی سے اپ ڈیٹ کرتے ہیں۔
گوگل کو لیگو بہت پسند ہے اور اتنا زیادہ پسند ہے کہ گوگل کا پہلا کمپیوٹر سٹور کرنے کا کمرہ لیگو سے بنا تھا۔
