SOURCE: http://www.bbc.com/urdu/science-39527655
دنیا ایک پائلٹ کی نظر سے
ہالینڈ سے تعلق رکھنے والے پائلٹ کرسچیئن وین ہیئسٹ کاک پٹ سے نظر آنے والے شاندار مناظر کی تصویر کشی کرتے ہیں۔
ان کی تصاویر میں پاکستان میں دریائے سندھ کے ڈیلٹا کے علاقے سے لے کر الاسکا کے اوپر قطبی روشنیوں تک کے مناظر دیکھے جا سکتے ہیں۔
CHRISTIAAN VAN HEIJST
CHRISTIAAN VAN HEIJST
اگرچہ وین ہیئسٹ اپنی ہر پرواز کے دوران تصویر کشی نہیں کرتے لیکن ہر ماہ تقریباً سو گھنٹے فضا میں گزارنے کے دوران انھیں اپنے اس شوق کی تسکین کا موقع مل ہی جاتا ہے۔
اکثر وہ اپنا کیمرہ کاک پٹ کی کھڑکی پر رکھ کر خوبصورت قدرتی مناظر کے متلاشی رہتے ہیں۔ ان کے مطابق ایک شاندار تصویر کھینچنے کے لیے انھیں کم از کم پانچ سے دس تصاویر کھینچنی پڑتی ہیں اور اگر وہ خوش قسمت ہوں تو ان سے ایک ایسی تصویر ہوتی ہے جو قابلِ دید ہوتی ہے۔
CHRISTIAAN VAN HEIJST
CHRISTIAAN VAN HEIJST
وین ہیئسٹ اکثر طویل دورانیے کی پروازوں پر کام کرتے ہیں جن میں طیارہ اڑانے کے لیے تین یا اس سے زیادہ پائلٹ تعینات ہوتے ہیں۔ اس سے انھیں اپنی نشست سے اٹھ کر بوئنگ 737 کے پر کے اوپر قطبی روشنیوں کی اس تصویر جیسے شاہکار عکس بند کرنے کا موقع مل جاتا ہے۔ کرسچیئن کے مطابق یہ روشنیاں اتنی تیز ہوتی ہیں کہ بعض اوقات چند سیکنڈز کا ایکسپوژر ہی اس تصویر کشی کے لیے کافی ہوتا ہے۔
CHRISTIAAN VAN HEIJST
CHRISTIAAN VAN HEIJST
یہ تصویر شمالی روس کی فضاؤں میں بنائی گئی اور اس میں طلوع ہوتے سورج کے ہمراہ مدھم قطبی روشنیاں بھی دیکھی جا سکتی ہیں۔ یہ تصویر تقریباً تاریکی میں کھینچی گئی۔
30 سیکنڈ تک کے ایکسپوژر سے تصاویر کے دھندلانے کا خطرہ پیدا ہو جاتا ہے اور ساتھ ہی پرواز کے ناہموار ہونے کا خدشہ تو ہمیشہ موجود ہی رہتا ہے۔ کرسچیئن کے مطابق ان کے ساتھ اکثر ایسا ہوتا ہے کہ وہ تصویر کشی کے لیے کیمرہ سیدھا کرتے ہی ہیں کہ طیارہ ہلنا شروع کر دیتا ہے۔
CHRISTIAAN VAN HEIJST
CHRISTIAAN VAN HEIJST
CHRISTIAAN VAN HEIJST
یہ تصویر ٹورانٹو کے اوپر ایک طوفان کی ہے اور کرسچیئن نے یہ تصویر بطور مسافر طیارے پر سفر کے دوران لی۔ فش آئی لینز استعمال کرتے ہوئے انھوں نے ایسا تاثر دیا کہ کیمرہ طیارے کے باہر موجود ہے۔
CHRISTIAAN VAN HEIJST
یہ آخری تصویر کوہِ ہمالیہ کے پہاڑی سلسلے پر غروبِ آفتاب کی ہے۔ کرسچیئن کے مطابق ایسے مناظر دیکھ پانا انھیں یہ احساس دلاتا ہے کہ وہ ایک شاندار نوکری کر رہے ہیں جو انھیں یہ مواقع فراہم کرتی ہے۔
CHRISTIAAN VAN HEIJST
تمام تصاویر بشکریہ کرسچیئن وین ہیئسٹ
No comments:
Post a Comment