آج گوگل نے اپنے ہوم پیج پر شیخ دین محمد کا 'ڈوڈل' لگایا ہے جس کے بعد بہت سے لوگ سوال کر رہے ہیں کہ شیخ دین محمد کون ہیں اور کیا کرتے تھے؟
شیخ دین محمد 1759 میں ہندوستان کے شہر پٹنہ میں پیدا ہوئے تھے۔ یہ وہ زمانہ تھا جب برطانیہ سے انگریز جوق در جوق آ کر ہندوستان میں بس رہے تھے، لیکن دین محمد نے الٹا راستہ اختیار کیا اور وہ جا کر برطانیہ میں آباد ہو گئے۔
انھوں نے نہ صرف برطانیہ کو اپنا گھر بنا لیا بلکہ لندن میں 'ہندوستان کافی ہاؤس' کے نام سے ایک ریستوران بھی کھول لیا جسے برطانوی سرزمین پر پہلا ہندوستانی ریستوران ہونے کا اعزاز حاصل ہے۔ آج ہندوستانی کری اور چکن تکہ وغیرہ کا شمار انگریزوں کے پسندیدہ ترین کھانوں میں ہوتا ہے۔
لیکن شیخ صاحب کے اسی پر اکتفا نہیں کی، ان کے کریڈٹ میں ایک اور اختراع بھی ہے جو ان کے نام سے کہیں زیادہ مشہور ہے۔ اور وہ ہے کہ انگریزی زبان میں لفظ 'شیمپو' کی شمولیت۔
بہت کم لوگ جانتے ہوں گے کہ شیمپو کو پہلی بار شیخ دین محمد نے متعارف کروایا تھا۔ ایسا کیوں اور کیسے ہوا، اس کی کہانی نیچے چل کر آئے گی، پہلے کچھ باتیں شیخ صاحب کے بارے میں۔
ایسٹ انڈیا کمپنی کے لیے خدمات
دین محمد کا تعلق حجاموں کے خاندان سے تھا۔ ان کی پیدائش کا زمانہ ہندوستان کی تاریخ کے متلاطم ادوار میں سے ایک تھا۔ ان کی پیدائش سے دو سال پہلے انگریزوں نے پلاسی کے میدان میں سراج الدولہ کو شکست دے کر ہندوستان میں اپنے پنجے گاڑ دیے تھے۔
جب وہ پانچ سال کے تھے تو ایسٹ انڈیا کمپنی نے بکسر کی جنگ میں مغل فوج کو بھی شکست دے کر سب کو حیرت زدہ کر دیا کہ ایک تجارتی کمپنی نے مغل بادشاہ کو نیچا دکھا دیا ہے۔ اس فتح کے ساتھ ہی انگریزوں نے پورے ہندوستان پر نظریں جما دی تھیں۔
اس دوران بہت سے ہندوستانیوں کو عافیت اسی میں نظر آئی کہ وہ انگریزوں کے ساتھ لڑنے کی بجائے ان کے ساتھ شامل ہو جائیں۔
یہی کام دین محمد کے خاندان نے کیا۔ پہلے ان کے والد اور بھائی انگریزوں کی فوج کا حصہ بنے اور پھر دین محمد بھی 11 برس کی کچی عمر میں ایسٹ انڈیا کمپنی کی فوج میں بھرتی ہو گئے۔ یہاں ان کا کام جنگ لڑنا نہیں تھا بلکہ فوجی کیمپ میں اپنے پیشے کی مناسبت سے مختلف خدمات انجام دینا تھا جن میں جراحی (سرجری)، مالش اور چمپی وغیرہ شامل ہیں۔
دین محمد کے والد تو جلد ہی چل بسے لیکن وہ ترقی کرتے کرتے صوبیدار کے عہدے تک پہنچنے میں کامیاب ہو گئے۔
تصویر کے کاپی رائٹTHOMAS MANN BAYNESImage captionشیخ دین محمد کی پورٹریٹ جو 1810 کے قریب بنائی گئی
انگریزوں کے ساتھ ایک طویل عرصہ گزارنے کے بعد دین محمد بھی انھی کے رنگ میں رنگ گئے، اور بظاہر دوسرے ہندوستانیوں سے الگ تھلگ ہو گئے۔ ایک دفعہ تو لوگوں نے انگریزوں کا ساتھ دینے کی پاداش میں ان پر حملہ بھی کر دیا۔ وہ بمشکل تمام جان بچانے میں کامیاب رہے۔
ایسٹ انڈیا کمپنی کو ہمیشہ سے وفادار ہندوستانیوں کی ضرورت تھی۔ چنانچہ انھوں نے دین محمد کو مختلف شہروں میں بھیجا تاکہ وہ وہاں کے حالات سے انگریزوں کو باخبر کریں۔ انھوں نے اس حیثیت سے دہلی، ڈھاکہ اور مدراس جیسے دور دراز علاقوں کا سفر کیا۔
چلو چلو، ولایت چلو
1783 میں دین محمد نے فوج کی نوکری سے استعفیٰ دے دیا اور ہندوستان چھوڑ کر آئرلینڈ چلے گئے۔ غالباً انھیں خطرہ رہا ہو گا کہ کہیں ایک بار پھر ان پر حملہ نہ ہو جائے۔
آئرلینڈ پہنچ کر انھوں نے ایک آئرش خاتون جین ڈیلی سے شادی کر لی۔
اسی دوران انھوں نے The Travels of Dean Mahomet کے نام سے کتاب لکھی جس میں اپنی زندگی کے مختلف تجربات اور سفروں کی تفصیلات بیان کی ہیں۔ یہ کتاب خاصی مقبول ہوئی اور آج بھی شوق سے پڑھی جاتی ہے۔ اس کتاب کی منظرنگاری اس قدر عمدہ ہے کہ بعض لوگوں نے شبہ ظاہر کیا ہے کہ شاید اسے کسی انگریز نے لکھا ہے، لیکن یہ بات قرینِ قیاس نہیں ہے کیوں کہ اس کتاب کے اندر ہندوستانی زندگی کی جو تفصیلات درج ہیں وہ کوئی ہندوستانی ہی لکھ سکتا تھا۔
انھیں ہندوستان کا وہ پہلا سفرنامہ نگار بھی قرار دیا جا سکتا ہے جس نے یورپ کے بارے میں لکھا۔
1807 میں دین محمد اپنے خاندان کے ہمراہ آئرلینڈ سے آ کر لندن میں بس گئے۔
تصویر کے کاپی رائٹGETTY IMAGES
انگلستان میں دیسی کھانے
اس وقت کا لندن ایک بین الاقوامی شہر بن چکا تھا اور یہاں دنیا بھر کے ثقافتی دھارے آ کر آپس میں ملنا شروع ہو گئے تھے اور یہاں ہر طرح کے تجارتی اور کاروباری مواقع موجود تھے۔
دین محمد نے اسی ماحول سے فائدہ اٹھاتے ہوئے بالکل الگ نوعیت کا تجربہ کرنے کا فیصلہ کیا۔
انھوں نے ہندوستان کافی ہاؤس کے نام سے ایک ریستوران کھول لیا جس کا مقصد انگریزوں کو ہندوستانی کھانوں کے ذائقے متعارف کروانا تھا۔ یہی نہیں بلکہ انھوں نے پہلی بار انگریزوں کو حقے سے بھی روشناس کروایا۔
یہ برطانیہ میں قائم ہونے والا پہلا ہندوستانی ریستوران تھا۔
بدقسمتی سے یہ کام بھی نہیں چلا اور دین محمد کو جنوبی ساحلی شہر برائٹن کا رخ کرنا پڑا۔
برائٹن آ کر انھوں نے ایک اور تجربہ کیا۔ اپنے خاندانی پیشے کی نوعیت سے وہ ایسٹ انڈیا کمپنی کی فوج میں بطور جراح اور مالشیے کا کام کرتے رہے تھے۔ اب انھوں نے اسی کام کو کاروباری بنیادوں پر شروع کر دیا۔
تصویر کے کاپی رائٹGETTY IMAGESImage captionاس وقت تمام برطانیہ میں ہر جگہ ہندوستانی کھانے شوق سے کھائے جاتے ہیں جس کے بنیاد گزار شیخ دین محمد ہیں
چمپی سے شیمپو تک
انھوں نے ایک حمام کھول لیا جس میں جڑی بوٹیاں ملے پانی سے غسل کروایا جاتا تھا اور اس کے بعد مخصوص قسم کے تیلوں سے مساج اور چمپی کی جاتی تھی۔
انگریزوں کے لیے یہ نئی چیز تھی۔ سٹیم باتھ اور پھر مساج سے تھکے ہوئے بدن پل بھر میں تازہ دم ہو جاتے تھے۔ دیکھتے ہی دیکھتے یہ کام چمک گیا اور جلد ہی شہر کی اشرافیہ دین محمد کی خدمات سے مستفید ہونے لگی۔
دین محمد نے زبردست کاروباری سوجھ بوجھ کا مظاہرہ کرتے ہوئے اخباروں میں اشتہار دینا شروع کیے جن میں دعویٰ درج ہوتا تھا کہ سٹیم باتھ کے پانی اور چمپی کے تیلوں میں وہ مخصوص قسم کی جڑی بوٹیاں استعمال کرتے ہیں اور اس مقصد کے لیے وہ ہندوستان کی قدیم اور توانا طبی روایات سے استفادہ کر رہے ہیں۔
اور یہیں سے شیمپو کی کہانی کا آغاز ہوتا ہے۔
دین محمد کی چمپی جلد ہی دور دور تک مشہور ہو گئی۔ ان کا کاروبار اس قدر گرم ہوا کہ انھوں نے اپنے حمام کی کئی شاخیں کھول لیں۔ بات یہاں تک پہنچی کہ شاہی خاندان کے بعض افراد بھی ان کے گاہکوں میں شامل ہو گئے اور ان کی چمپی کے گن گانے لگے۔
یہی لفظ چمپی بگڑ کر انگریزی کا شیمپو بن گیا اور آج بچے بچے کی زبان پر ہے۔
اور یہی وجہ ہے کہ آج گوگل نے شیخ دین محمد کا ڈوڈل پیش کر کے ان کی خدمات کو تسلیم کیا ہے۔
GOOGLE
THOMAS MANN BAYNES
GETTY IMAGES
GETTY IMAGES
No comments:
Post a Comment